January 2012| جنوری 2012
 

میہ کیازِ چھہ یہ شعر پسند


(یتھ کالمس منز ییہ پریتھ دۅیہ ہفتہ نٔوس شعرس پیٹھ کتھ کرنہ۔)

منیب الرحمن

 

تژھ تٍر یواں ٲس زِ رتھ شٹھہے رگن منز/ اکھ پرانۍ چٹھیا ٲس ہتین دارِ مٔرم راتھ

یہ چھہ مظفر عازم سند اکھ زبان زد عام شعر۔

سیٹھا کم شعر چھہِ زبان زد عام گژھان۔ اکثر چھہِ امہ مۅکھہ یاد تھونہ یوان یا روزان زِ تم چھہِ اکس بییس موقعس پیٹھ بکار یوان۔ زبان زد عام گژھنک وحہ چھہ عموما شعری حسن کم تہ اکار بکار ینچ قابلیت زیادہ آسان۔ مثلا یہ شعر

یاد ماضی عذاب ہے یارب/ چھین لے مجھ سے حافظہ میرا

اتھ منز چھہ نہ خیالہ کہ کُنہِ حدس تام ولگتنہِ ورٲے بییہ کانہہ شعری حسن یا خوبی۔ خیالن ولگیتُن دین چھہ نہ شعری عملہِ نیبر تکیازِ امہ سیتۍ چھہ کُنہِ معمولی خیالس منز کانہہ غیرمعمولی یا بالکل نوٚو پہلو نیران یمہ کنۍ پرن والۍ سندس ذہنس منز تعجب، سوال، تجسس، تحیر ، بیترِ ہوۍ جذبہ پیدہ گژھان چھہِ۔ یہ شعر چھہ ضرب المثل بنیومت تکیازِ اتھ منز چھہ انسانی تجربک اکھ تیتھ پزر موجود یس اکثرن ہنز تہ اکثر اوقاتن ہنز نمایندگی کران چھہ۔ شعرس منز چھہ سوال پیدہ گژھان زِ یہ شخص کیازِ چھہ پتھ کال چہ ژٮتہ آوری سیتۍ یوت پریشان؟ اتھ شعرس چھہِ زہ معنی ممکن۔ متکلم سند تکلیف چھہ یا تہ اوہ مۅکھہ زِ تسند پتھ کال چھہ تسندس ازکالس برعکس (1) سیٹھا مارۍ موٚند اوسمت، نتہ چھہ (2) سیٹھا تکلیف دہ اوسمت یس نہ تس ونیک تام مشان چھہ۔ شعرس منز یتھہ پاٹھۍ زہ (متضاد) معنی پیدہ کرنۍ تہِ چھہ شعری حسن ماننہ یوان۔ امہ علاوہ چھہ اتھ شعرس منز کارآمدی ورٲے بییہ کینہہ۔ اتھ شعرس مقابلہ چھیہ مظفر عازم سندس شعرس منز شاعری رژھہِ رژھہِ بٔرتھ۔

جاری