سینیر ادیب موہن لال آش سپدۍ از آتھوارِ یکم جنوری جوٚمہِ سۅرگواسۍ۔
موہن لال ٲسۍ شاعر، نقاد تہ تحقیق کار تہ یمن میدانن منز چھہ یہند سیٹھا دیت۔ تم ٲسۍ کاشرِ زبانۍ ہنزِ پاپرجایی خاطرہ بے لوث خدمت کران۔ آش صٲب ٲسۍ ویجبیارِ 1934 منز زامتۍ۔
موہن لال آش سند چھہ کژ شسعری تہ تنقیدی مجموعہ شایع سپدمت۔
سابقہ ڈایریکٹر ریڈیو رفیق رازن ووٚن زِ موہن لال اوس اکھ صوفۍ صفت انسان یس کاشرِ تصوفچ تہ صوفی شاعری ہنز جان زان ٲس۔ سہ اوس پانہ تہِ اکھ جان شاعر۔
مشہور افسانہ نگار ہردے کول بھارتی ین وون اکس بیانس منز ز سورگواس آش اوس زندہ زوہ کم سمجھنہ آمت تہ ام سنز اس کم قدر شناسی سپزمژ۔ تم کر وومید ظاہر ز مرنہ پتہ ییہ تس کن توجہ کرنہ۔
ادبی مرکز کمرازن ووٚن اکس بیانس منز زِ یہندِ مرنہ سپد کاشرس ادبس سخ نقصان۔
مشہور شاعر تہ سماجی کارکن نسیم شفائی آو تسندس "نہ ژھاے نہ عکس" مجموعہ کلامس پیٹھ ساہتیہ اکاڈمی ہندِ ایوارڈ ک اعلان کرنہ۔ یہ چھیہ گۅڈنچ کٲشر زنانہ شاعر یس ہندوستانک یہ ساروے کھۅتہ تھوٚد ادبی انعامہ دنہ آو۔ امہ انعامک اعلان آو مختلف زبانن لرِ لوٚر دِلہ ساہتیہ اکاڈمی منز 21 دسمبر کرنہ۔
شفایی چھیہِ زہ شعرہ سۅمبرنہ دریچہ مژرتھ (1999) تہ نہ ژھاے نہ عکس (2009) شایع کرِ مژہ۔ ساہتیہ اکاڈمی ایوارڈ برونہہ آو شفایی اتھۍ شعرہ سۅمبرنہ پیٹھ گۅڈنیک ٹیگور ادبی ایوارڈ 2009 منز دنہ۔
ایوارڈچ فنکشن سپدِ 12 فروری دلہِ منز۔
شفایی چھیہ 1952 منز سرینگرہ زامژ۔ کاشرس منز ایم اے کٔرتھ چھہِ یم کالجس منز پرناوان۔ امۍ سنز شاعری چھیہ کشیرِ ہندٮن موجودہ حالاتن ہندِ تعلقہ زنانہِ ہند ردعمل پیش کران۔
ہیوٚر کن
بزرگ ادیب مظفر عازمن بنوو سیٹھا محنت کٔرتھ کاشرِ کہ خاطرہ گلمرگ نستعلیق ناوہ اکھ یونیکوڈ فانٹ یمہِ کنۍ مایکروسافٹ ورڈ تہ انٹرنیٹس پیٹھ کاشر لیکھن پرن ممکن سپد۔ نیب ویب سایٹ چھیہ عازم صابنہِ پننہ ویب سایٹہِ علاوہ گۅڈنچ تہ فی الحال کنی ویب سایٹ یمۍ کاشرِ زبانۍ ہندس امس ناودار شاعر سنزِ امہِ محنژ ہند فایدہ تُل۔
یہ یونیکوڈ فانٹ تہ اتھ سیتۍ وابستہ کی بورڈ چھہ عازم صاننہِ ویب سایٹہِ پیٹھ دستیاب۔ امہِ ویب سایٹہِ ہند ایڈرس چھہ kashmirilanguage.com ۔
یونیکوڈ فانٹ سیتۍ چھہ یہ فایدہ زِ اسۍ ہیکون باقی زبانن ہیدۍ پاٹھۍ کاشر مایکروسافٹ ورڈس منز ٹایپ کٔرتھ ۔ امہِ علاوہ ہیکوکھ اسۍ انٹرنیٹس پیٹھ کاشر لیکھتھ پٔرتھ۔
ہیوٚر کن
اکاڈمی کوٚر 25 مے اکس تقریبہ منز امین کامل سنزِ سندس ادبس تہ زندگی پیٹھ شیرازک اکھ خاص نمبر جاری۔ اتھ موقعس پیٹھ آسہ وادی ہنزہ کینہہ اہم شخصیژ موجود یمن منز ڈایریکٹر ریڈیو جاوید اقبال، کشیرِ ہندِ سرکارک میڈیا کنسلٹنٹ فاروق نازکی، معروف ادیب تہ جرنلسٹ غلام نبی خیال تہ اکاڈمی ہندۍ سیکریٹری طفر اقبال منہاس ٲسۍ۔
خیال صٲبن پوٚر اتھ تقریبہِ منز کامل صٲبس پیٹھ اکھ جامع مقالہ۔ تقریبہِ منز ووٚن نازکی صٲبن زِ کامل چھہ شعرہ کس میدانس منز اکہ علامژ ہنز حیثیت تھاوان۔ تمۍ ووٚن زِ کامل چھہ سون سرپرست تہ سہ چھہ کاشرِ زبانۍ ہنز ڈکشنری۔ کامل ییہ کاشرس ادبس تہندِ دتہ کنۍ ہمیشہ یاد تھاونہ۔
شیرازکۍ ایڈیٹر طفر مظفرن ووٚن زِ کاملن کٔر اردو تہ فارسی نش کاشرِ غٚزلچ اکھ الگ پہچان قایم۔
ہیوٚر کن