January 2012| جنوری 2012
 


   

 

مجاہد


برج ناتھ بیتاب

 

سورے شہر اوس کرفیوہس منز دٕیان مگر زیبس ٲس عید۔ سۅ ٲس مجاہدن دۅیو دۅیو اتھو ٲہی کران۔ تس اوس سہ انسان سخ کھران یُس مجاہدن خلاف کانہہ کتھ کران اوس۔
زیبہ ٲس دراصل ان پڑھ ۔تس نہ اوس سیاستس سٍتۍ کانہہ واسطہ تہ نہ تحریکہ سٍتۍ۔ سۅ ٲس صرف اوہ کِنۍ خۅش زِ مجاہدو ٲسۍ شراب وان بند کرناومتۍ تہ تنہ اوس تسند خاندارمحمد رمضان اکھ پانہ تہِ شامس سیوٚدے گھرہ یوان تہ بییہ اوس دۅہس زینۍ متۍ ساری پونسہ گھر س دوان۔ہمسایہ باین تہِ اوس زیبس سٍتۍ کتھہ کرنس مزہ یوان۔تہ پتہ اگرکانہہ ہمساے باےتہند تران ٲس زیبہ ٲس تس اکہ نتہ بییہ بہانہ کتھن رٹان ۔زیبُن کلامہ اوس مجاہدن دعاے خیر کرنہ سٍتۍ شروع گژھان تہ تمن دعاے خیر کرنہ سٍتۍ اند واتان۔ تمہ اوس نہ پانہ زانہہ مجاہد وچھمت مگر ہمساے بایو اوس تس ووٚنمت زِ تم کتھۍ چھِہ آسان۔
محمد رمضان اوس کامہِ نیران تہ زیبہ ٲس گھرچ کٲم مۅکلٲوتھ دارِ پیٹھ نظارہ وچھان تہ ہمساے باین سٍتۍ مسایہ ژٹان۔
از ٲس تس مگر وٲلنج پھٹنس آمژ۔ شہرس منز اوس بہو دۅہو پیٹھہ کرفیوـ کٲنسہِ اوس نہ کانہہ اندازہ زِ کرفیو کر تُلن۔
محمد رمضانس ٲس کوٚبس لتھ دوا آمژ ، سہ اوس کرفیوہس منز دے دۅہس نیندراہ کران۔ تس زن اوس ومبرن ہندتھکُن ژلان۔
زیبہ ٲس سٮٹھاہ عٲجز یوان۔ اکھ نہ کتھ کرنس کانہہ۔ بییہ نہ نیبرمہ دنیاہک کانہہ پے پتاہ۔
از رود نہ تس پانس تام۔ دۅہلہِ بتہ کھٮتھ یتھے محمد رمضانن لر ترٲو، زیبن اوٚن ہاکہ کرونجلاہ تہ بیٹھ دارِ لٕے مژرٲوتھ ہاکھ ژارنہ کہ بہانہ کوچس کُن مُدے گنڈتھ۔ تس ٲس راے زِ کانہہ نتہ کانہہ ہمساے باے آسہِ اپارِ کوچہ توتہِ شیشہ منزۍ وچھان۔
ہمسایہ دارین ونۍ دِتھ ییلہ نہ تس کانہہ ہمساے نظرِ گوٚو تمہِ ترٲو کوچس اکہ اندہ پیٹھہ بییس اندس نظر۔
کوچہ کہ اپٲرمہ طرفہ ٲسۍ زہ لڑکہ اورۍ کُن پکان۔ تمہ کر ۍتم پرزناونچ کوشش۔تس ییلہ نہ کانہہ سٲنکت آو، تس باسیوو یم گژھن مجاہد آسنۍ۔ زیوٹھ کرہُن ریش۔ نوۍ پھیرن۔ ہٹس گلوبند ولتھ۔ زنگن جینز پتلون، کھۅرن نوۍ گولا بوٹھ۔ تہ اتھہ زہ بیبس منز۔ زیبس گوٚو پورہ یقین زِ یم گژھن مجاہد آسنۍ ۔
تس اوس ہمساے بایو مجاہدن ہند یۅہے حلیہ ووٚنمت۔ سۅ گییہ اندرۍ کنۍ خۅش زِ از کرِ سۅ مجاہدن ہند دیدار۔ مگر تمِہ دوٚپ رون تہِ کرناون از دیدار۔ سۅ گیہ رٲسے تہ تُلن رون نیندرِ۔
زیبہ۔ ہے نیندر چھے حض۔
محمد رمضان۔ ( اڈ نیندرِ منز) کیا سا دلیل؟ خیرے چھا؟
زیبہ۔ وۅتھ حض مجاہدن ہند دیدار کر۔
محمد رمضان۔مجاہد؟ کتہِ؟
زیبہ۔ پکھ۔ اپارِ ہاوے دارِ کنۍ۔
محمد رمضان ووٚتھ یکدم تھوٚد ۔ تس گوٚو خوف پیدہ۔ تمۍ سونچ یہ بلایہ گٔژھ نہ اسی برادنۍ۔ سہ توٚر دوان دوان اپور۔ اتہِ دژن دارِ کنۍ نظر تہ زہ مجاہد دورِ وچھتھ گوٚو تس اندرم شہہ اندرتہ نیبرم شہہ نیبر بند۔ تس باسیوو از چھہ شراب چینک حساب دیُن۔ تمۍ کٔر زنانہِ بیوٲری۔
محمد رمضان۔ ہے ژہ کیا سا مارناوکھ۔ ژیہ کیازِ ترٲوتھ دٲر ییلہ۔ کر تہ پاسِ خۅدا بند یہ دٲر ۔اژتہ اندر۔
زیبہ۔ ژہ مہ آس یوت کھوژان۔ مجاہد چھہِ نہ کٲنسہ ہنگتہ منگہ ستاوان۔
محمد رمضان۔ تہ ضروری چھا یورے پان چھیپہ دین۔
زیبہ۔ (اسان اسان) ژہ مہ کھوژ۔ تمن آسہِ پے زِ ژیہ چھے شرابس توبہ کورمت۔
محمد رمضان۔ کوٚرمت چھم نہ، کرنووہس۔ زبردستی۔
زیبہ۔ تُل دٮد تہِ گییہ وٲلدے۔
محمد رمضان۔ اچھا وۅنۍ کر تہ دٲر بندمہربانی کٔرتھ۔
زیبہ۔ (دٲر بند کران) کھوژہ بڈُے چھکھ۔
محمد رمضان۔ مٮہ ما چھہ چانۍ پاٹھۍ پان کھران۔ ہتہ ہونہِ کھٮتہ میانۍ زنگ۔
زیبہ۔ اگر وٕنۍ کانہہ آلو کری شرابہ ہاوی دَو تلکُھ ۔ کرفیو ؤرفیو گژھی مشتھ۔
محمد رمضان۔ مہ آس زخمن کرول تلان۔ بہ اگر وُنہِ تہِ پرانے بوتلہ چھلکھ اکھ شام ہٮکہ گذٲرتھ۔
زیبہ۔ بس تہ سے آسہِ مٮہ ییتہِ نیرک بہانہ۔
محمد رمضان۔ اتہِ چھے وتہ سارے بند۔ گژھکھ کوٚت۔
زیبہ۔ ژہ چیہہ شراب، بہ ہاوے بہ کوٚت گژھہ۔
محمد رمضان اوس ژکہِ زنانہِ سٍتۍ مسخری کران۔ مگر دِلس آسس شرابک ناو بوزتھ کھنجہ گژھان، تس ٲسۍ وُنہِ کژ تامے دۅہ گٲمتۍ شراب تراوۍ مِتس۔ سہ تہِ اوسُن اوہ کِنۍ تروومت زِ مجاہدو ٲسۍ شراب وان زبردستی بند کرنٲومتۍ۔ نتہ اوس تس شرابک چسکہ پنداہن ورین ہند ۔ از ییلہ تس زنانہِ دھمکی دژِ تس آو پننہِ مردانگی ہند غیرتھ تہ دِلس منز کوٚرن خیال زِ یتھے کرفیو وۅتھہِ سہ گژھِہ پریس اینکلیو تہ کٲنسہ نتہ کٲنسہ ِجرنلسٹس ہیہ اکھ زہ بوتلہ بادام باغہ آرمی کینٹونمینٹہ منزہ أنتھ۔ نتہ کرِ کینہہ بہانہ تہ ترِ جوٚم تہ شہلاوِ دزمژ وٲلنج۔ تس پیوٚو جیمیک دوس ڈوگرہ صٲب ژٮتس۔
شراب انناونچ سکیم منس منز سونچتھ آیہ تس بتُھس پیٹھ زنتہ بشاشتھ۔ تس پھیور وٹھن پیٹھ اسُن۔تس اوس از واریاہہِ کٲلۍ بڈِ بڈِ اسنک من۔ سہ اوس اسن کھنگھالہ تراوُن یژھان۔ مگر نیبرہ گوٚو دروازس ٹھس۔ زیبن دژِ دارِ لیہ کنۍ نظر۔ تس گوٚو بُتھس اکہ رنگہ بیاکھ رنگ۔ تمہِ تھٲو مشکلن دٲر واپس بند تہ اشارہ سٍتۍ ہووُن رٍنس زِ تمِ زہ مجاہد چھہِ برس پٮٹھ۔ محمد رمضانن دژ دارِ ہندِ شیشہ کِنۍ نظر تہ تس پھیر بتُھس ژھٹھ۔ دارِ شیشہ منزۍ دژن نظر ہمساین تتہِ زنتہ نہ اوس زن تہ نہ زٲنپن۔ تس آو نہ سمجھے زِ سہ کیاہ کرِ۔ ییتس کالس گیہِ دروازس ٹاسرارے۔
اکھ مجاہد۔(دروازس ٹاس کڈتھ) کیا حض دۅہلی چھوا شۅنگتھ، کنہِ کنن چھوہ پھمب بوٚرمت۔ محمد رمضانس باسیوو مجاہدن چھہ خشم۔ تمۍ تٲر کمبرہ منزہ وُزس منز لانپھ تہ تراوِہے دروازس ہانکل۔ مگر زنانہِ دژس نرِ تھف تہ عارہ کژو چشمو رکوُون۔
زیبہ۔(پھسرایہ منز مگر تھانتھرتھ)۔ ٹھہر کوٚت وسکھ۔ یتھہ پاٹھۍ مہ وس۔ پتاہ چھا کس چھہ۔
زیبہ۔ ژہ مہ وس، بہ تراوہ ہانکل۔
محمد رمضان۔ہے یہ نسا چھہ نہ بحث کرنک وقت۔ یمن پیٹھ چھا بھروسہ۔
زیبہ۔ توے تراوہ بہ ہانکل، تس باسیو اکس برنزس زِ از گیہ زندگی ختم۔تمہ دیت نہ رٍنس ہرگز تہِ نیرنہ ۔ گژھ ژہ تر پتمس کمبرس منز۔
محمد رمضانس باسیو از چھہ مرُن ، مجاہدن چھہ کتہِ تام پے لوٚگمت زِ بہ اوسُس شراب چیوان۔ از تراون نہ۔تمۍ سونچ یہ بنہَ تہ بنہِ دۅشونی بٲژن یکہ وٹہ۔
محمد رمضان ۔پکھ دۅشوے گژھو یکوٹہ۔ یہ بنہِ تہ بنہِ یکوٹہ۔
زیبہ۔ بہ نیرہ برونٹھ برونٹھ، ینہ ژیہ پرزناونے
محمد رمضان۔ ہے میہ کتہِ سٲ زانن یم۔ یم خبر کتیکۍ۔
زیبہ۔ دپان یمن چھیہ ٹریننگ آسان پرزناونچ۔ نتہ کوٚت ین یم سٲنس گھرس بلایہ لگنہِ۔
محمد رمضان۔گۅڈہ گوٚے ژیہ بلۍ شک۔ بلکٮن یم مجٲہد آسن نہ۔
زیبہ۔ بییہ کُس ییہ یتھ کرفیوہس منز وۅپر محلس منز۔یتھس کرفیوہس منز دپان چھہِ تمے یوت اورہ یور یِتھ گژھتھ ہیکان۔
محمد رمضان۔ وتھ آسیکھ رٲومژ۔
زیبہ۔ میون نبی صٲب بوزِن وتھے راوۍنکھ۔سون مہ ییہ نکھ وتھ۔
محمد رمضان۔ کرُکھ بییہ دعاے خیر۔ ونان اوسسے نا یم نے چھنہ کٲنسہِ ہنِدۍ۔
زیبہ۔وۅںۍ متہ کر تہ ونکٮس بحث۔ وۅلہ ہمساین کرو آلو۔
محمد رمضان۔ یُتھ تمن وارے پے لگہِ زِ میہ کوٚر مجٲہدو شرابس پیٹھ شلکھ۔
زیبہ تہ محمد رمضان ٲسۍ ووُزس منز کتھہ کران تہ نیبرہ اوس دروازس ٹھس ٹھس گژھان بٲژو دۅیو ترٲو اکھ اکس سرینۍ نظر تہ اتھس تھپھ کرتھ واتۍ دروازس نش۔
ییتس کالس ٲس دۅیو لڑکو دروازس ٹاسہ رارے ملناومژ ۔ زیبن ہوو رٍِنس اونگجہ سٍتۍ ژھۅپہ کرنک اشارہ۔
زیبہ۔ (دِل دوٚر کرتھ) کُس حض چھوہ؟
اکھ مجاہد۔ یہ چھا حض محمد رمضان سند گھرہ۔دروازس نش۔
زیبہ۔ کُس حض محمد رمضان؟
مجاہد۔ ہے دروازہ تراو حض تہ ونوے۔ دروازہ تراو۔ اسۍ کیاہ جن چھا زِ کھیمووہ۔
زیبن دژ رٍنِس کن نظر۔ تمۍ ہووُس اشارہ تہ زیبن تروو دروازہ۔
زیبہ۔ ( پانہ نیار ہٲوِتھ )اسلام علیکُم۔
مجاہد۔(محمد رمضانس کُن)۔ ژہ چھکھ حض محمد رمضان۔ زیبس باسیوو لُکھ ٲسۍ پزی ونان، یم مجاہد اے چھہِ پانے پرزناوان۔
محمد رمضان۔ میہ تہِ حض چھہ محمد رمضان ناو مگر تۅہہِ کُس ۔۔۔
مجاہد۔( تسنز کتھ ژٔٹتھ)۔ اسۍ چھنِ محمد رمضان ژھانڈان یُس ٹیکسی چلاوان چھہ۔¬¬مجاہد وچھتھ ژوٚل محمد رمضانس زو نیرتھ۔تہ زیبس ٲس عجیب حالتھ۔ اکہ طرفہ اوس تس رٍنۍ سنزِ زندگی ہند سوال تہ بییہ طرفہ ٲس تس مجاہد وُچھنچ خوشی۔ دل اوسُس ونان کھارکھ یم مجاہد ہیوٚر تہ چاوکھ قہوہ مگر دیماغ اوسُس دپان ژھنکھ لنجہِ رٹتھِ کڈتھ نیبر۔
زیبہ ٲس مُجأہدن بُتھس وُچان تہ مُحمد رمضان اوس تلۍ ٹاریو تہندۍ پھیرنہ اندر اتھہ وُچھان۔ تس باسیو مُجأہدن چھِ کلیشنکوف بندوق بیبِس منز۔
یمن مُجأہدن ہُند ہاو باو وُچھتھ گییہ یمن دۅشونی بأژن بولتی بند ۔ مُجأہدن کھژ ژکھ۔
مُجأہد۔ ہے توہۍ کِتھۍ سأ یارہ۔ نہ چھوہ ونان اندر اژُن نہ چھوہ کران مازرتھ۔
زیبس زنتہ رودُوی نہ پانس تام تہ دوپنکھ
زیبہ۔ پکو حض اژو حض اندر۔ نہ حض یہ اے تۅہیہ پنہ نوُی گھرہ چھوُہ۔ مُجأہدن کھۅت شرارتھ ۔
مُجأہد۔ تمی چھِ براندس پیٹھ۔ اسہِ چھنہٕ تیژاہ فُرصتھ۔ پکھ حض مُحمد رمضان صأب اسہِ سیتۍ۔ ژے سیتۍ حض چھے کتھ کرنۍ۔
مُحمد رمضانس ژول زوُو نیرتھ۔ تس کلۍیہ زیو۔ زیبن وأ جۍ یکدم کلہ پیٹھٕ پوژ تہ ترأون ¬مُجأہدس کھۅرن تل
مُجأہدو دِیت زیبنہ نین ویداکھن کُن کمی دھیان تہ رٕسے ہووکھُ مُحمد رمضانس أچھِ سیتۍ مُجأہد۔ ہے مُحمد رمضاناہ اسہِ نہ حض چھنہٕ ایژاہ فُرصتھ۔ یُن اے چھویے تہ یہ نتہ بوزی
یتہِ سورےُ محلہ بدنام گژھکھ محلس منز۔ اکھ مُجأہد اوس بالکُل ژھوپہ کرتھ صرف وُچھان
تہ بوزان۔ زیبس باسیو سوُ مُدبر ۔ تس روز راے خبر سےُ ما کرہ رحم۔ تمہ گنڈۍ تس گُلۍ۔ نبی صأبُن سوال دیوتنس مگر تمۍ بوز نہ اکھ کتھ تہِ۔
تس کھوت مگر شرارتھ تہ دژن زیبنۍ پوژ ہوت دأرتھ۔ مُحمد رمضانس کرن نرہ تھف تہ کوڈنُ پانس سیتۍ نیبر۔ مُحمد رمضان اوس نیم مۅردو گومُت۔ زیبہ آیہ ٹاس کرتھ دروازس سیتۍ چھاونہ۔تسندہ پتھر پینچ آواز بوز مُحمد رمضانن گھرہِ نیبرہ کنہ۔ تمۍ دژ پتھ کُن نظر زیبہ أس پان لتھٕ کھۅکھُل کرتھ مُحمد رمضانس پتہ پتہ پکناوان تہ تس اتھو سیتۍ اشارہ کران زِ ہمساین کر تہ الو۔ پانس أس تس صدمہ سیتۍ آوازی بند گأمژ۔
مُجأہدن تہِ دژ پتھ کُن نظر تہ تتہ زیبہ وُچھتھ کورُن تس رعب تہ دوپنس اژھ حض اندر۔تمۍ ہیوت اتھٕ بیبہِ منزہ نیبر کڈُن تہ زیبس آو باسنہ زن تہ تمۍ مُحمد رمضان مارنہ باپتھ بیبہ تلہ کلیشنکوف کڈ۔ تس آو غش تہ سۅ پیہ ٹاس کرتھ پتھر۔
مُحمد رمضانن بوز دب لگنچ صرف آواز أچھو وُچُھن نہ کینھہ۔ نیم مۅردہ حالتس منزی اوس سوُ خۅس زِ مۓ اگر مُجأہد مارن تہ زیبہ بچے یہ توتہ۔
قدم داہ مرہ کڈتھ نیو مُحمد رمضان مُجأہدو لبہ کُن تہ بیبہ منزہ کوڈُکھ سامانہ۔
زیبہ۔ ہے بأے صأباہ مے سیاہ سرہِ پیٹھ کرو رحم۔ تۅہۍ چھوہ نا ماجہ بینہ وألۍمُحمد رمضانن تھاوہ أچھِ ؤٹھتھ۔ تس باسیو موتھ آو۔
مُجأہدن کڈۍ بیبہ منزہ اتھ زہ نیبر تہ زہٕ شراب بوتلہ پلناوین مُحمد رمضانس تہ دوپنس
یمہ حض چھے جیمہ پیٹھہ ڈوگرہ صأبن سوزمژہ۔
مُحمد رمضانس گو اچھین انہ گوٹ تہ سوُ آو ٹاس کرتھ پتھر لاینہ۔
زیبن بوز تسندہ دروپُ گژھتھ پتھر پینچ آواز تس باسیو مُجأہدو مور سوُ تہ تمہ دژ کُنی کرکھ
کُنہ کانھ چھُوہ نو خلقِ خۅدایوُ مُجأہدو ہو مأرۍ۔ مُجأہد ناو بوزتھ ترأو نہ کأنسہ ہمساین دأر
ؤژھ۔