نيب / آنلاين نيب

 

نیب:یمن دۅہن اسۍ علی گڈھ پران ٲسۍ ژہ اوسکھ منزۍ منزۍ اردو پاٹھۍ نظما وظما ونان۔ تمنے دۅہن چھپییہ چانۍ اکھ نظم امیزان کی بچیاں شب خونس منز تہِ ۔ تمہِ پتہ تہِ رودکھ ژہ شاعری کران مگر کاشرس کُن ینک کیا وجہ چھہ، نیب دوبارہ شایع گژھنہ علاوہ ؟ چانہِ شاعری ہند کیا چھہ آگُر؟

حیات:میہ ووت واریاہ کال انگریزی تہ اردو س منز لیکھان مگر زہ ؤری برونہہ کوٚو میہ ہنگہ تہ منگہ کاشر لیکھن شروع۔ اتھ پتہ کنہِ کم عوامل چھہِ، میہ چھیہ نہ پانس پتاہ۔ البتہ ونہ بہ یہ زِ میٲنس لاشعورس تہ شعورس دۅشونی سطحن پٮٹھ چھیہ اکھ ارتعاشی کیفیت۔ میانۍ علایم چھہِ عربہ کہ صحرا منزہ وۅتھان تہ باقین تہذیبن تہ کشیرِ ہندس تاریخس یُس شاہ ہمدان سندِ دورہ پٮٹھہ شروع گژھان چھہ، منز پننۍ رابطہ ژھانڈان۔ میون مسلہ چھہ انسانہ سنز روحانی شناخت، یۅس تمام تہذیبی رابطن نظرِ منز تھٲوتھ معنی چھہ لبان۔ میانہِ وجودچ تہ فنچ سٲرے تلاش چھیہ رمز کاینات، فخر موجودات، وجہ تخلیق، ختم مرتبت حضرت محمد مصطفی صلی اللہ علیہ وسلم تہ تسندٮن اہل بیت طاہرینن ہنزن مارۍ منزن تخلیقی ژھاین تہ گراین ہنز تلاش تہ میانہِ خاطرہ چھہ سورے کاینات امۍ سے ذات مقدسس اندۍ اندۍ نژتھ معنی لبان۔ یہ چھہ رۅبہ سند محبوب ، شفیع المذہبین تہ رحمت للعالمین۔ تمام انسانی تہ روحانی تہ وجودی تہ تہذیبی کشمکش، تخلیق و تعمیرک مرکز تہِ چھہ سُے تہ یمن ہنز کہوٹ تہِ چھہ سُے۔ قومن ہند عروج تہ زوال، تہند شناخت، عظمت، غلامی، جبر، فن تہ علم یہ سورے چھس بہ سمجھان اتھۍ کہوچہ کھستھ معنی لبان تہ کشیر تہ کاشرۍ سندٮن تمام مسلن ہند معنی مطلب تہِ چھس بہ امۍ سے آغس ستۍ رشتن ہنزِ روشنی منز وچھنچ کوشش کران۔ امہِ ستۍ گژھہِ نہ میہ مذہبی شدت پسندی ہنز ہانژھ لگنۍ۔ بہ چھس یہ سمجھان زِ فنس منز گژھہِ مذہبیت آسنۍ تیلہ چھہ یہ زیادہ میوٹھ، رسیُل تہ سوٚن، معنی دار تہ تہدار بنان۔ ہاں یہ چھہ ضروری زِ مذہب تہ مذہبیت چھہِ زہ الگ تہ وکھرہ چیز تہ دۅشونۍ ہندۍ معنی تہ اثرات چھہِ بیوٚن بیوٚن۔

نیب:فنس متعلق کیا چھہ چون نظریہ؟

حیات:فن کیا چھہ؟ یہ چھا داخلی حقیقتن، تمناہن یا نفسیاتی ترکیبن، تقاضن یا احساساتن تہ ضرورتن ہند اظہار؟ اتھ چھا انسانہ سندٮن مابعد الطبعی بنیاذن تہ قضاین ستۍ کانہہ تعلق؟

»مزید